Nú eru síðustu forvöð að hitta hina merku listamenn Mary Ellen Mark og Martin Bell að máli en Íslandsdvöl þeirra lýkur senn. Mánudaginn 10. september klukkan 17 mun Mary Ellen Mark kynna verk sín fyrir gestum Þjóðminjasafnsins. Hún mun einnig árita bók sína Undrabörn sem Þjóðminjasafnið gaf út í tilefni af opnun samnefndrar sýningar um helgina. Bókin er til sölu í Safnbúð Þjóðminjasafnsins.

Sýningin Undrabörn með ljósmyndum sem Mary Ellen Mark hefur tekið af fötluðum börnum í Öskjuhlíðarskóla, Safamýrarskóla og Lyngási var opnuð með marföldum hátíðahöldum í Þjóðminjasafni Íslands um helgina. Á opnanirnar komu samtals um 1100 manns.

Sýningin er fjórþætt. Auk ljósmynda Mary Ellen Mark sem sýna veruleika fatlaðra barna á Íslandi í dag er sjónum beint að skólaumhverfi þeirra í ljósmyndum Ívars Brynjólfssonar á Veggnum, listsköpun undrabarnanna sjálfra er til sýnis í anddyrinu og kvikmynd Martin Bell um Alexander er sýnd daglega.

Kvikmynd Martin Bell fjallar um Alexander Viðar Pálsson, einn nemanda Öskjuhlíðarskóla. Hún er sýnd í fyrirlestrarsal Þjóðminjasafnsins, alla daga frá klukkan 13 til 17. Kvikmyndasýningin hefst að jafnaði á heila tímanum og tekur um 45 mínútur.

Mary Ellen Mark mun einnig árita bók sína í Þjóðminjasafninu milli klukkan 15 og 16 þriðjudaginn 11. september.