Laugardaginn 19. maí, verður opnað nýtt ljósmyndagallerí að Skólavörðustíg 4a í Reykjavík. Þar verða til sölu myndir í takmörkuðu upplagi eftir rúmlega tuttugu af færustu ljósmyndurum landsins. Einnig verða til sölu nýjar og gamlar íslenskar ljósmyndabækur sem og ýmisleg hönnunarvara sem byggir á ljósmyndinni.

Í sérstökum sýningarsal verður svo opnuð ný einkasýning i hverjum mánuði. Það er Ragnar Axelson (RAX) sem ríður á vaðið með sýningu sem hann nefnir KULDI. Á næstu mánuðum verða svo opnaðar sýningar eftir Pál Stefánsson, Árna Sæberg og fleiri.

Á meðal annara ljósmyndara sem verða með verk sín til sölu eru Sigurgeir Sigurjónsson, Börkur Sigþórsson, Vigfús Birgisson, Þorvaldur Örn Kristmundsson, Árni Torfason, Kjartan Þorbjörnsson, Kristinn Ingvarsson, Gunnar V. Andrésson, Friðþjófur Helgason, Kristín Bogadóttir, Stefán Karlsson, Thorsten Henn og fleiri. Stefnt er að því að fjölga í þessum hópi.

Framkvæmdastjóri er Ari Sigvaldason. Hönnuður gallerísins, sem hefur hlotið nafnið Fótógrafí, er Stígur Steinþórsson leikmyndahönnuður og um annað útlit og hönnun sá Stefán Einarsson grafískur hönnuður.
 
Stefnt er að því að Fótógrafí verði vettvangur fyrir alla þá sem unna góðum ljósmyndum. Galleríið verður opið alla daga vikunnar. Frá 12 til 18 á virkum dögum og frá 10 til 16 um helgar.