Héraðsdómur Reykjavíkur hefur komist að þeirri niðurstöðu, að ljósmyndurum með iðnréttindi og nemendum í ljósmyndun sé einum heimilt að taka ljósmyndir í vegabréf hjá sýslumönnum og lögreglustjóra. Dómurinn féllst hins vegar ekki á kröfu Ljósmyndarafélags Íslands um að viðurkennt yrði að óheimilt væri að haga gjaldtöku við útgáfu vegabréfa þannig að myndataka sé innifalin í kostnaði umsækjanda vegna útgáfu vegabréfs.

Í dómi héraðsdóms segir, að útgáfa vegabréfa sé hluti af verkefnum sem stjórnvöldum séu falin með lögum. Vinnsla þeirra sé því í atvinnuskyni í skilningi iðnaðarlaga. Samkvæmt því verði að fallast á, að þegar teknar eru ljósmyndir til notkunar við útgáfuna skuli það gert undir stjórn meistara í ljósmyndun og yfirleitt af meistara, sveini eða nemanda í ljósmyndaiðn. Skipti ekki máli hér þó ljósmyndin verði ekki nýtt til neinna annarra nota.

Dómurinn segir jafnframt, að iðnlærðir ljósmyndarar hafi ekki einkarétt á töku ljósmynda þó aðrir en þeir megi ekki stunda ljósmyndun í atvinnuskyni. Sé ekki að lögum unnt að banna öðrum töku ljósmynda, sem eigi að nota í vegabréf, þótt unnt sé að viðurkenna að töku stafrænna mynda hjá lögreglustjóra og sýslumönnum skuli iðnmenntaðir ljósmyndarar sinna.

Með breyttri tilhögun við útgáfu vegabréfa séu ekki skert eignar- eða atvinnuréttindi ljósmyndara þannig að í bága fari við stjórnarskrá. Í vernd þessara réttindi felist ekki fortakslaus skylda ríkisins til að tryggja áframhaldandi óskert viðskipti og breyta ekki lögum þannig að viðskiptin geti minnkað.

Heimild: mbl.is